შეტყობინებაგანათება სახლისათვის - ეკო ნათურები
განათება სახლისათვის - ეკო ნათურები
განათება სახლისათვის - ეკო ნათურები

წარმოგიდგენიათ ისეთი ადგილი, სადაც ერთი დღე მხოლოდ ერთი წუთი გრძელდება?

ამ პატარა პლანეტაზე ცხოვრობს ადამიანი, რომელიც წუთში ერთხელ ანთებს და აქრობს ფარანს. დილის დაწყებას ფანრის ჩაქრობით ხვდება, შემდეგ ისევ ანთებს და ასე, რუტინულად, გრძელდება და გრძელდება.

”პატარა უფლისწულის” პერსონაჟისგან განსხვავებით, გარემოს განათებისთვის დიდი ენერგიის დახარჯვა და ნათურის ხშირი ანთება არ დაგჭირდებათ, თუ შესაბამის ხარისხს შეარჩევთ.

კარგი განათების გარეშე ნებისმიერი სახლის ინტერიერი მოსაწყენი და უინტერესო გამოჩნდება, ჩვენს მიერ საგულდაგულოდ შერჩეული ავეჯი კი-ზედმეტად უფერული.

ცნობილ ამერიკელ ტელეწამყვანს, ელენ დეჯენერესს, ხუმრობით აქვს ნათქვამი: ”თავდაპირველად არაფერი არ იყო. ღმერთმა თქვა: ”გამოჩნდეს სინათლე” და განათდა სამყარო. განათების შემდეგ ისევ არაფერი არ იყო, მაგრამ ამის დანახვა უკეთესად შეგეძლო”.

სწორედ შესაბამისი განათების საშუალებით შესაძლებელია მყუდრო, კომფორტული გარემოს შექმნა. განათება კი ნათურიდან იწყება.

როგორ შეარჩიოთ სახლისთვის კარგი ხარისხის ნათურები?

ნათურების არჩევისას რამდენიმე დეტალის გათვალისწინება დაგჭირდებათ:

  • განათება არ უნდა ღლიდეს თვალებს და ოთახის სხვადასხვა კუთხეს ოპტიმალურად ანათებდეს.
  • სად, რომელი ფირმის და რა ფასის ნათურების შეძენას გეგმავთ.
  • და ბოლოს, ოთახის განათებამდე დაგჭირდებათ არჩევნის გაკეთება ჩვეულებრივ და ენერგოდამზოგავ ნათურებს შორის.

 

რა არის ენერგოდამზოგავი ნათურა?

მეცნიერებმა გლობალური დათბობის პროცესების გამო მომავალი მუქ ფერებში წარმოგვიდგინეს. სურათი დაახლოებით ასე გამოიყურება: ადამიანები საკვების ძიებაში, შტორმი, ძლიერი ქარიშხალი და ტყის ხანძარი. თბილი კლიმატი გამოიწვევს ცხოველების ზომაში შემცირებას, გაქრება მრავალი პატარა კუნძული და ყინული დნობას დაიწყებს.

მსოფლიოს სხვადასხვა მეცნიერები ამტკიცებენ, რომ ამ პროგნოზის შეცვლა შესაძლებელია და ეს ჩვენი სახლებიდან უნდა დავიწყოთ.

 

რა კავშირია გლობალურ დათბობასა და ჩვენს სახლში არსებულ განათებას შორის?

 

სტანდარტული ნათურებისგან განსხვავებით, ეკო ნათურები მცირე რაოდენობის ნახშირორჟანგს გამოყოფენ, რაც ნაკლებად აბინძურებს გარემოს.

იმის მიუხედავად, რომ ჩვეულებრივი ნათურის საშუალო ღირებულება 60 თეთრია, ეკო-ნათურის კი -მინიმუმ 2 ლარი, მათ მთავარ პლუსად ეკონომიურობა ითვლება. რატომ?

მაღალი ხარისხის ეკო ნათურა 65%-დან 80%-მდე ნაკლებ ელექტროენერგიას მოიხმარს, ვიდრე ჩვეულებრივი.

რამდენიმე საათიანი მუშაობის შემდეგ  სტანდარტული ნათურა ხურდება, რადგან ელექტროენერგიის დიდი ნაწილი მავთულის, სპირალის გაცხელებას ხმარდება. ენერგოდამზოგავი ნათურის მუშაობისას კი ენერგია მაქსიმალურად გარდაიქმნება განათებად.

 

როგორ ახასიათებენ ეკო ნათურას?

ენერგოდამზოგავი ნათურების ყველაზე ხშირი გამოყენება 50-იან წლებში ამერიკაში დაიწყეს. დღეს კი საქართველოში ეკო ნათურების ნახვა შესაძლებელია სხვადასხვა მაღაზიებსა და ბაზრობებზე. მომწოდებლები ხშირად საუბრობენ იმაზე, თუ რამდენად მნიშვნელოვანია ცნობილი ფირმის პროდუქციის შეძენა, სადაც მყიდველს ხარისხისა და სერთიფიცირების გარანტია ექნება. მარტივად რომ ვთქვათ, ეკო ნათურის დახასიათებისას რამდენიმე პლუსისა და მინუსის გამოყოფა შეიძლება:

  • მუშაობის ვადა

საშუალო მაჩვენებლით ეკო ნათურებს 6000-დან 15000 საათამდე შეუძლია მუშაობა, ჩვეულებრივ ნათურებს კი-მხოლოდ ათასი. ეს კი ნიშნავს იმას, რომ ეკო ნათურის ახლით შეცვლა ხშირად არ მოგიწევთ. თუმცა, მისი მუშაობის ხანგძლივობა დამოკიდებულია იმაზე, თუ რამდენად ხშირად აანთებთ და ჩააქრობთ.

  • განათების ფერების არჩევანი

ეკო ნათურების შერჩევისას შეგიძლიათ აირჩიოთ განათების სამი ტონიდან ერთ-ერთი: დღის, ბუნებრივი და თბილი განათება. დღის და ბუნებრივი განათება ძირითადად საზოგადოებრივ თავშეყრის ადგილებსა და ოფისებში გამოიყენება, თბილი კი - ბინებში.

  • შემცველობა

ჩვეულებრივი ნათურები შედგება მინისგან და ფოლადისა და ვოლფრამის ნივთიერებებისგან. ეკო ნათურა კი შეიცავს მცირე რაოდენობით ვერცხლისწყალსა და ფოსფორს და აქვს ულტრაიისფერი გამოსხივება. ულტრაიისფერი გამოსხივება მოქმედებს ადამიანის კანზე და საჭიროა ჩვენგან საშუალოდ 30 სანტიმეტრის მანძილზე განთავსდეს ნათურა.

რა თქმა უნდა, ვერცხლისწყლის ნივთიერების შემცველობაზეა დამოკიდებული, თუ რამდენად ხარისხიანი იქნება ნათურა. ხოლო თუ ეს შემცველობა დასაშვებ ზღვარზე მაღლაა, ადამიანის ჯანმრთელობისთვის საზიანოა.

ასევე, თუ ნათურა გაგიტყდათ, რეკომენდებულია გარეთ გატანა, მინიმუმ 15 წუთით ფანჯრის გაღება და ამ პერიოდში ოთახის დატოვება.

  • სიკაშკაშე

და ბოლოს, რამდენად გაანათებს ოთახს?

დაბალი ხარისხის ეკო ნათურებს გარკვეული დრო სჭირდება, რომ მაქსიმალურ სიკაშკაშეს მიაღწიოს. დაახლოებით 2 წუთის შემდეგ კი ოთახი სრულად განათებულია. ასევე, შესაძლოა იაფფასიანი ეკო ნათურების განათებამ ციმციმი დაიწყოს.

სხვადასხვა ბრენდის წარმომადგენლების თქმით, მაღალი ხარისხის პროდუქციას მსგავი პრობლემა არ აქვს და მხოლოდ რამდენიმე წამი სჭირდება სრული განათებისთვის.

 

შეფასება
დატოვე შეფასება
ყველა შეფასება