დახურვა
სიაში დაბრუნება

კომერციული ფართი ბიზნესისათვის

დამატების თარიღი: 7 მაისს, 2019

რა კავშირია ბიზნესის წარმატება მის ადგილმდებარეობასთან?

 ცნობილი კომპანია ’THE WALT DISNEY’ ლოს- ანჯელესის ერთ-ერთ ავტოფარეხში შეიქმნა და ჩამოყალიბდა. ავტოფარეხი დამაარსებლის ბიძას ეკუთვნოდა და დროებით სამუშაო ადგილად გამოიყენებოდა.

დღეს კი ’THE WALT DISNEY COMPANY’ იმ რამდენიმე ბიზნესთა რიცხვში შედის, რომელმაც მილიარდობით მოგება ნახა და გამორჩეულ წარმატებას მიაღწია.

თუ თქვენ ბიზნესს იწყებთ და ეძებთ შესაბამისს სამუშაო ადგილს, ნათესავის ავტოფარეხის გარდა, შესაძლოა, სხვა ვარიანტებიც არსებობდეს.

სწორად შერჩეული კომერციული ფართი და მისი ადგილმდებარეობა ერთ-ერთი მნიშვნელოვანი ფაქტორია თქვენი ბიზნესის წარმატებისთვის.

როგორ შევარჩიოთ კომერციული ფართი?

ხშირად ქართული კომპანიები ფართს ქირაობენ, რადგან სასტარტო ბიზნესს კომერციული ფართის ყიდვის ბიუჯეტი არ აქვს გათვალისწინებული. ასევე, შესაძლებელია ბიზნესის ტიპმა გარკვეული ცვლილება განიცადოს, ან გაკოტრდეს და ქირის ხელშეკრულება განსაკუთრებით მოსახერხებელია, მობილობის კუთხით. სწორედ ამიტომ, კომერციული ფართის ქირაობა სულ უფრო და უფრო ტრენდული ხდება.

კომერციული ფართის შერჩევისას, რა თქმა უნდა, პირველ რიგში ვაკვირდებით ყოველთვიურ გადასახადს. თუმცა, ასევე მნიშვნელოვანია, სად მდებარეობს ეს ადგილი.

საქართველოში ხშირად კომერციული ფართის რამდენიმე ტიპი გვხვდება: 1.ბინა, სადაც ხშირ შემთხვევაში რამდენიმე ოთახი, აბაზანა და სამზარეულოა 2. დიდ სავაჭრო ცენტრში/შენობაში არსებული ფართი 3. არსებული ბიზნესი, მაგალითად: მაღაზია, სალონი, საოფისე ფართი შესაბამისი ტექნიკით და ა.შ.

ფართის დაქირავებამდე აუცილებელია რამდენიმე დეტალის გათვალისწინება:

  • არის თუ არა კომერციული ფართი ისეთ უბანში, სადაც ამ კონკრეტული ბიზნესის პოტენციური კლიენტი ცხოვრობს, ან ხშირად ხვდება? მაგალითად, თუ კომპანია ჩამოსასხმელ ყავას ყიდის, უნდა შეირჩეს ბენზინგასამართ სადგურთან, მეტროსთან, გაჩერებასთან და სხვა ხალხმრავალ ადგილთან არსებული კომერციული ფართი.
  • შეესაბამება თუ არა კომერციული ფართი ბიზნესის იმიჯს? თუ თქვენს კომპანიას კონკურენტთან შედარებით მაღალი ფასები აქვს და პოტენციურ აუდიტორიად საშუალო და მაღალი ფენის საზოგადოებას მოიაზრებს, არ იქირაოთ გაურემონტებელი, კონდიცირების არმქონე ოფისი.
  • არის თუ არა პარკინგის ადგილი? ასევე, რამდენად ადვილადმისადგომია  მანქანის გარეშე?
  • მოსახერხებელია თუ არა თანამშრომლებისთვის ეს უბანი? თუ 24 საათიანი მომსახურების სერვისი გექნებათ, რამდენმად მარტივი იქნება თანამშრომლებისთვის საღამოს საათებში ოფისის დატოვება? შესაძლოა კორპორატიული ავტომანქანის დაქირავება და დამატებით ხარჯების გათვალისწინება დაგჭირდეთ.
  • არის თუ არა ახლოს  ისეთი ადგილები, რაც თქვენს პოტენციურ კლიენტს მიიზიდავს? მაგალითად: თუ თქვენი ბიზნესი მამაკაცთა სატრენაჟორო დარბაზია, სასურველია სპორტული ტანსაცმლის მაღაზიასთან  იყოს ახლოს.
  • კომერციული ფართის დაქირავებამდე განსაზღვრეთ, გეგმავთ თუ არა უახლოეს პერიოდში გაფართოებას და რამდენად შეესაბამება ფართის სიდიდე თქვენს მოთხოვნებს.
  • დაბოლოს, განსაზღვრეთ წინასწარ, გსურთ თუ არა ახლო მანძილზე კონკურენტი კომპანიის არსებობა? რატომ?

მომხმარებლები ხშირად ისეთ სავაჭრო ობიექტებს არჩევენ, სადაც მათთვის საინტერესო პროდუქციის მრავალფეროვანი არჩევანი არსებობს. შესაძლოა, სწორედ ეს იყოს ერთ-ერთი გადამწყვეტი ფაქტორი გაყიდვების გაზრდის.