გაყიდვების სტატისტიკა

TBC Capital-ის კვლევის მიხედვით, 2019 წლის პირველ ნახევარში, თბილისში გაყიდული ბინების ზუსტმა რაოდენობამ 16 296-ს მიაღწია, რაც თითქმის იმდენივეა, რამდენიც 2018 წლის ანალოგიურ პერიოდში (16 271). საერთო ჯამში, 2019 წლის პირველ ნახევარში გაყიდულმა ბინებმა 1 119 476 მ² შეადგინა.

ძველი და ახალი აშენებული ბინები

საინტერესოა გაყიდული ბინების მდგომარეობა. 2019 წლის პირველ ნახევარში ახალაშენებული ბინების წილმა გაყიდულ ბინებში 62 %, ანუ 10 086 ბინა შეადგინა. აღნიშნული პროცენტული წილი სარეკორდოა. ახალაშენებული ბინების ყიდვის ზრდის ტენდენცია 2017 წლის პირველი ნახევრიდან დაიწყო და დღემდე იზრდება. აღსაღნიშნავია ისიც, რომ რაოდენობრივად ახალაშენებული ბინების გაყიდვებმა ყველაზე დიდ რიცხვს გასული წლის მეორე ნახევარში მიაღწია, როდესაც 11 939 ახალაშენებული ბინა გაიყიდა. რაც შეეხება ძველაშენებულ ბინებს, მათი გაყიდვების რაოდენობა წლევანდელი წლის პირველ ნახევარში (6 210) თითქმის გაუთანაბრდა 2017 წლის მეორე ნახევრის მაჩვენებელს, როდესაც 6 295 ძველი აშენებული ბინა გაიყიდა.

ბინებზე მოთხოვნა ფართის (მ²) მიხედვით

ახალაშენებულ ბინებზე მოთხოვნის გაზრდასთან ერთად, იზრდება მოთხოვნა შედარებით პატარა მოცულობის ბინებზე. 2019 წლის მეორე კვარტალში, გაყიდული ახალაშენებული ბინების უმრავლესობა სწორედ შედარებით პატარა მოცულობის ბინებზე მოდიოდა: 50 მ²-დან 100 მ²-მდე ფართის ბინები გაიყიდა 3 345, ხოლო 50 მ²-მდე - 1 475 ბინა. 100 მ²-მდე ახალაშენებული ბინების გაყიდვის მაჩვენებელი 2017 წლიდან საგრძნობლად იზრდება, გაყიდვების სარეკორდო მაჩვენებელს კი 2018 წლის მეოთხე კვარტალში მიაღწია, როდესაც ამ ტიპის 5 297 ბინა გაიყიდა. პატარა მოცულობები პოპულარულია ძველაშენებულ ბინებშიც. 2017 წლის პირველი კვარტლიდან მოყოლებული, ყოველ კვარტალში 2 000-ზე მეტი 100 მ²-მდე ფართის ბინა იყიდება, ზოგიერთ შემთხვევაში კი მათი რაოდენობა 3 000-ზე მეტია.

ბინების გაყიდვები უბნების მიხედვით

გაყიდვების მხრივ, ტოპ სამი უბანია: საბურთალო, დიდი დიღომი და გლდანი. 2019 წლის პირველ ნახევარში, საბურთალოზე გაყიდულმა ბინების რაოდენობამ 3 500-ს გადააჭარბა, რომელთაგანაც უმრავლესობა ახალაშენებული იყო. გაყიდვების მხრივ მეორე ადგილზე მყოფ დიდ დიღომში, წინა წლის ანალოგიურ პერიოდთან შედარებით, გაყიდვების მკვეთრი შემცირებაა. სამაგიეროდ, შესამჩნევი ზრდა დაფიქსირდა გლდანში, სადაც გაყიდული ბინების რაოდენობა 2 000-ს გადასცდა. აღსაღნიშნავია ასევე ის, რომ გლდანში გაყიდულ ბინებს შორის, ძველი და ახალი აშენებული ბინების რაოდენობა თითქმის ერთმანეთის ტოლია. რაც შეეხება სხვა უბნებს, 2019 წლის პირველ ნახევარში, წინა წლის ანალოგიურ პერიოდთან შედარებით, გაყიდვების რაოდენობით საგრძნობი მატება ჰქონდა ისანსაც, ხოლო ვაკეში, დიდუბესა და კრწანისში გაყიდვების შესამჩნევი ვარდნა დაფიქსირდა.

ბინების მოცულობა უბნების მიხედვით

გარეუბნებში გაყიდული ბინების უმრავლესობა შედარებით პატარა მოცულობის ბინებია. გლდანში, 70 მ²-მდე ფართის ბინებს საერთო რაოდენობის 78% უკავია, ხოლო სამგორში 76%. თუ ამას უფრო ჩავშლით, გლდანსა და სამგორში ყველაზე პოპულარული გაყიდვებით 50 მ²-მდე ფართის ბინებია. ანალოგიური სიტუაციაა ჩუღურეთშიც. საბურთალოზე ყველა ტიპის ბინა მეტნაკლებად მოთხოვნადია, თუმცა გაყიდვების მხრივ 50 მ²-დან 70 მ²-მდე ფართის ბინები მცირედით ლიდერობს. დაახლოებით იგივე სიტუაციაა დიდ დიღომშიც, სადაც ძირითადი აქცენტი პატარა ბინებზე მოდის, გაყიდვების მხრივ კი 50 – 70 მ²-ის ფართოს ბინებია წინ. განსხვავებული ვითარებაა ვაკეში, გარდა იმისა რომ აქ 50 მ²-დან ყველა ტიპის ბინა მოთხოვნადია, დაინტერესება დიდი ფართის მქონე ბინებზეც საკმაოდ მაღალია: გაყიდული ბინების 23% 100 მ²-დან 150 მ²-მდე ფართის ბინებზე მოდის, ხოლო 14% 150 მ²-ზე ზემოთ. მსგავსი სიტუაციაა მთაწმინდაზეც, თუმცა ვაკისგან განსხვავებით, აქ დიდი ფართის ბინების გარდა საკმაოდ მაღალი მოთხოვნაა 50 მ²-მდე ბინებზე, რაც ძირითადად განპირობებულია აღნიშნულ უბანში მაღალი ტურისტული აქტიურობით.

ბინების ფასები უბნების მიხედვით

ფასების მხრივ, ყველაზე ძვირადღირებული უბნები ვაკე, მთაწმინდა და საბურთალოა. ვაკესა და მთაწმინდაზე ახალაშენებული ბინების ფასი 1 მ²-ზე 1 000$-მდე ადის, ხოლო საბურთალოზე - 900$-მდე. ყველაზე დაბალფასიანი უბნების სამეულში კი გლდანი, დიდი დიღომი და სამგორი შედიან. აღნიშნულ უბნებში 1 მ²-ის ფასი 600$-მდე მერყეობს როგორც ახალ, ისე ძველაშენებულ ბინებზე.

ბინების შეძენა უცხო ქვეყნის მოქალაქეების მიერ

2019 წლის პირველ ნახევარში, თბილისში გაყიდული ბინების 8% უცხო ქვეყნის მოქალაქეებზე მოდის. ზოგადად, უცხოელების მიერ თბილისში შეძენილი ბინების რაოდენობა 2015 წლიდან იზრდება, ყველაზე მაღალ მაჩვენებელს კი 2018 წელს მიაღწია, როდესაც მთლიანი წლის განმავლობაში, თბილისში გაყიდული ბინების 13% სწორედ უცხოელების მიერ იქნა შეძენილი. შესამჩნევი ცვლილებებია კონკრეტული ქვეყნის მოქალაქეების მიერ შეძენილ ბინებზე. თუ 2015 წლის მანძილზე, უცხო ქვეყნის მოქალაქეებს შორის, რუსეთის მოქალაქეების მიერ შეძენილი ბინები 40%-ს შეადგენდა, 2018 წელს მათი რიცხვი 10%-ზე ჩამოვიდა. საგრძნობი მატებაა ირანის მოქალაქეების მიერ შეძენილ ბინებზე: 2015 წელს, უცხო ქვეყნის მოქალაქეებს შორის, მათი რიცხვი 2% იყო, 2018 წელს კი 61%. საერთო ჯამში კი, 2015 წლიდან დღემდე, უცხო ქვეყნის მოქალაქეებზე გაყიდული ბინების 42% ირანზე მოდის, 18% რუსეთზე, 11% კი ევროპის სხვადასხვა ქვეყნებზე.

იპოთეკური სესხები

საინტერესოა უძრავი ქონების სექტორში არსებული იპოთეკური სესხების სტატისტიკაც. 2019 წლის პირველ ნახევარში, იპოთეკით შეძენილი ბინების რაოდენობა მკვეთრად შემცირდა და გაყიდული ბინების 30%-ს ჩამოსცდა, ხოლო 2019 წლის მე-2 კვარტალში 42%-მდე გაიზარდა. 2016 წლიდან 2018 წლის ჩათვლით, იპოთეკით შეძენილი ბინები საერთო რაოდენობის 40%-50% იყო, კონკრეტულ კვარტლებში კი მათი რაოდენობა 50%-საც აჭარბებდა.

სამშენებლო ნებართვები

საინტერესოა მშენებლობის ნებართვების გაცემის სტატისტიკაც. 2012 წელს გაცემული ნებართვების რაოდენობა საკმაოდ დაბალი იყო - მხოლოდ 82 გაცემული ნებართვა. 2013 წლიდან მათი რაოდენობა მნიშვნელოვნად გაიზარდა 2017 წლის ჩათვლით ყოველწლიურად 200-ზე მეტი ნებართვა გაიცემოდა, მათ შორის აღსაღნიშნავია 2016 წელი, როდესაც 299 მშენებლობის ნებართვა გაიცა. 2018 წელს რაოდენობა შედარებით შემცირდა და მთელი წლის მანძილზე 149 გაცემული ნებართვა დაფიქსირდა. 2019 წლის პირველ ნახევარში მშენებლობის 91 ნებართვა გაიცა. შედარებისთვის, 2018 წლის ანალოგიურ პერიოდში ნებართვების რაოდენობა 70 იყო, ხოლო 2017 წლის პირველ ნახევარში - 121. მიმდინარე წლის პირველ ნახევარში, ყველაზე მეტი სამშენებლო ნებართვა დიდ დიღომში გაიცა - 24 მშენებლობა საერთო ფართით 119 000 მ². მეორე - მესამე ადგილებს საბურთალო და სამგორი იკავებენ, 16 და 12 მშენებლობის ნებართვით. ყველაზე ცოტა სამშენებლო ნებართვა კრწანისში გაიცა, აქ მხოლოდ 3 მშენებლობაა, თუმცა მათი საერთო ფართი 43 000 მ²-ია. 4 სამშენებლო ნებართვაა გაცემული ჩუღურეთში, მათი საერთო ფართი კი მხოლოდ 3 000 მ²-ს შეადგენს.

სტატია მომზადებულია TBC Capital-ის კვლევაზე დაყრდნობით.