ძაღლს ტყუილად არ ჰქვია ადამიანის საუკეთესო მეგობარი და მასთან სამეგობროდ არ აქვს მნიშვნელობა, რა პირობებში ცხოვრობთ ან რამდენად დიდია თქვენი სახლი. თუ მტკიცედ გაქვთ გადაწყვეტილი, რომ იყოლიოთ ძაღლი, ჩვენი ბლოგი დაგეხმარებათ სახლისთვის საუკეთესო ჯიშის შერჩევაში.
სანამ თქვენს არჩევანს რომელიმე ძაღლზე შეაჩერებთ, უნდა დაფიქრდეთ, შეგიძლიათ თუ არა, დრო დაუთმოთ თქვენს საუკეთესო ოთხფეხა მეგობარს. ყველა ძაღლს, ზომის მიუხედავად, ჭირდება სეირნობა. თავიდან მისი გასეირნება ძალიან სახალისო პროცესია, მაგრამ დროთა განმავლობაში, გადაიზრდება რუტინაში. თუ თქვენ ვერ შეძლებთ დღეში ერთხელ, მინიმუმ ნახევარი საათით მაინც გაასეირნოთ ძაღლი, სჯობს დაფიქრდეთ, ღირს თუ არა მისი ყოლა.
აუცილებლად გასათვალისწინებელი რეკომენდაციებია, რომ ძაღლს ყოველდღე ჭირდება გასეირნება და, თუ ხართ ალერგიული, ძაღლის სახლში ყოლამ შეიძლება გააუარესოს თქვენი ალერგიული ფონი.
მაშ ასე, გთავაზობთ საუკეთესო ძაღლის ჯიშებს, რომლებიც შეგიძლიათ იყოლიოთ სახლში და თან პატარა ბავშვებთან ამეგობროთ.
ყველას გეყოლებათ ნანახი საოცრად გრძელი ტაქსა და ალბათ ვერც კი წარმოიდგენთ, რომ არის ძალიან ათლეტური და მოძრავი ჯიში. მნიშვნელოვანია ისიც, რომ იგი ადვილად იწვრთნება და მარტივად ასწავლით სხვადასხვა ბრძანების შესრულებას. საყოველთაო კონსესუსია, რომ ტაქსა არის ერთ-ერთი საუკეთესო ჯიში, რომელიც შეგიძლიათ იყოლიოთ სახლში.
იაპონური შპიცი ადვილად მოსავლელ ჯიშად ითვლება. მისი ბეწვის სტრუქტურა ისეთია, რომ ჭუჭყი, ტალახი და მტვერი მარტივად არ ეკვრის. მის გასასუფთავებლად, ხშირ შემთხვევაში, სავარცხლის გადასმაც კი საკმარისია და შეიძლება გავიდეს თვეები ისე, რომ არ მოგიწიოთ დაბანა. საყურადღებო ფაქტია ისიც, რომ აქვს ბევრად ნაკლები სუნი სხვა ძაღლებთან შედარებით.
ფრანგული ბულდოგი სახლისთვის ერთ - ერთი ყველაზე პოპულარული ჯიშია. მას ამ სტატუსის მოპოვებაში თავისი თვისებები უწყობს ხელს. გამორჩეულია მრავალმხრივ, ძალიან საყვარელია შესახედავად და ყველა სიტუაციაში დადებითია. საუკეთესოდ იქცევა ბავშვებთანაც, ყოველთვის მზად არის მათთან სათამაშოდ. არ იზრდება დიდი, რაც გაძლევთ საშუალებას, რომ პატარა სახლშიც კი იყოლიოთ.
არსებობს შნაუცერის სამი სახეობა: მინიატურული, სტანდარტული ზომის და გიგანტური. სამივეს სხვადასხვა სახელები ქვიათ: რიზენშნაუცერი - გიგანტურს, მიტელშნაუცერი - სტანდარტულს და ცვერგშნაუცერი - მინიატურულს. ეს სახეობები სხვადასხვა ჯიშად განიხილება, მაგრამ მათ საერთოც ბევრი აქვთ. პირველი საერთო მახასიათებელი არის ის, რომ არცერთს თითქმის არ ცვივა ბეწვი, რაც სახლის პიბობებში ძალიან მნიშვნელოვანია, მაგრამ მიუხედავად ამისა, მათ ბეწვს მაინც ჭირდება მოვლა. ისინი ითვლებიან საუკეთესო კომპანიონებად ყველა სიტუაციაში და აქვთ ალერსიანი ხასიათი, არიან გონიერები, მაგრამ მათთვის ჯიუტობაც არაა უცხო, რის გამოც ცოტათი გაგიჭირდებათ გაწვრთნა.
გასათვალისწინებელია ის ფაქტი, რომ გიგანტური შნაიცერი ბევრად აქტიურია დანარჩენ ორთან შედარებით, ამიტომ მას ბევრად მეტი მოძრაობა და დიდი სახლი სჭირდება.
ლაბრადორი ყველაზე პოპულარული ძაღლია მთელს მსოფლიოში. იგი საოცრად ერთგული და მოსიყვარულეა. ერთ - ერთ ყველაზე გონიერ ჯიშად არის აღიარებული, ამიტომაც მას ხშირად შევხვდებით როგორც პოლიციელი ძაღლის როლში, ასევე უნარშეზღუდული ადამიანების კომპანიონად. სხვა ზემოთ ჩამოთვლილ ჯიშებთან შედარებით, ლაბრადორი უფრო მოზრდილია და მუდმივი აქტიურობა ჭირდება, ამიტომ პატარა სახლში მისი ყოლა გაგიჭირდებათ. მის გაწვრთნაში დროს ტყუილად არ დახარჯავთ, იგი მთელი ოჯახის, განსაკუთრებით კი ბავშვების საუკეთესო მეგობარი იქნება.
შეიძლება გაგიკვირდეთ, მაგრამ პუდელი ერთ-ერთი ყველაზე ჭკვიანი ძაღლის ჯიშად ითვლება. არსებობს სამი სახის პუდელი: სტანდარტული (ყველაზე დიდი), მინიატურული (საშუალო) და თოი (ყველაზე პატარა). პუდელი გამოირჩევა სისუფთავის სიყვარულით. აქვს წყნარი და მხიარული ხასიათი და ყოველთვის მზად არის ჩაერთოს ყველა სახის აქტივობაში. პუდელი ადვილად იწვრთნება და, რაც ყველაზე მთავარია, აქვს ჰიპოალერგიული ბეწვი. გასათვალისწინებელია ერთი ფაქტორი, პუდელს იმდენად უყვარდება თავისი პატრონი, რომ თუ უყურადღებოდ დატოვებთ, შესაძლებელია ამ ფაქტმა დიდი სტრესი მიაყენოს მას.
ბოსტონ ტერიერი ერთ - ერთი ყველაზე პოპულარული ჯიშია აშშ-ში. მას აქვს ბევრი დადებითი თვისება: უყვარს ოჯახის წევრებთან ერთად ყოფნა და ბავშვებთან თამაში, გამოირჩევა კარგი ხასიათით, ადვილად იწვრთნება და აქვს მოდარაჯე ძაღლის თვისებები. მისი ბეწვი ადვილად მოსავლელია, რაც მნიშვნელოვანია სახლის პირობებში ცხოვრებისას. გასათვალისწინებელია, რომ მას აქვს დიდი ენერგიის მარაგი, რომელიც უნდა დახარჯოს სეირნობისას, თამაშისას და სხვა აქტივობების შესრულების დროს.
ბასენჯი ცნობილია როგორც ძაღლი, რომელიც არ ყეფს. თუ არ გინდათ, რომ თქვენ და თქვენი მეზობლები ძაღლის ყეფამ შეგაწუხოთ, მაშინ შეგიძლიათ არჩევანი ბასენჯიზე შეაჩეროთ. იგი არის ძალიან კარგი კომპანიონი და უყვარს თამაში. მისი ბეწვი ადვილად მოსავლელია, არ საჭიროებს ხშირ დაბანას.
წარმოიდგინეთ ბრიტანეთის სამეფო ოჯახი, შეიძლება ძნელი გამოსაცნობი იყოს, რა ძაღლი ეყოლებოდა დედოფალ ელიზაბეტს, მაგრამ ჩვენ გეტყვით, რომ სამეფო ოჯახის ძაღლი სწორედ უელსური კორგი პემბროკია. აღნიშნული ჯიში ხასიათდება მოსიყვარულე, დადებითი ხასიათით, მაგრამ სიჯიუტეც არ არის მისთვის უცხო. ძალიან უყვარს ჭამა და რომ არ გასუქდეს, პატრონს ეკისრება მის სწორად კვებაზე პასუხისმგებლობა. ახასიათებს კარგი მოდარაჯე ძაღლის ინსტინქტი და მცირედი საფრთხის შემთხვევაშიც კი იწყებს ყეფას. მასთან ერთად პატარა ზომის სახლშიც შეძლებთ ცხოვრებას.
ფოქს ტერეირი ერთ-ერთი გამორჩეული ჯიშია ტერიერებში. იგი არის აქტიური, მოუსვენარი და უყვარს ყეფა. მისთვის შიშის გრძნობა უცხოა, ნებისმიერი სიდიდის ძაღლზე შეიძლება გაიწიოს. ამასთანავე არის მზუნველი ბავშვების მიმართ. არსებობს ორი სახის ფოქს ტერიერი: უხეშბეწვიანი და დაბალბეწვიანი. ისინი ბეწვის სიდიდის გარდა თითქმის სხვა არაფრით არ განსხვავდებიან ერთმანეთისგან. მათი კარგად გაწვრთნა ლეკვობიდანვე საჭიროა და ამის შედეგად გეყოლებათ მეტად გამჭრიახი, დამჯერი და ჭკვიანი ძაღლი. ძალიან ბევრი ოჯახის საუკეთესო მეგობარი სწორედ ფოქს ტერიერია.
ლივოს ბლოგი
