სახლს ცოტა რამ თუ ათბობს ისე, როგორც შინაური ცხოველი, რომელიც მუდამ მზად არის საუკეთესო მომენტები მოგვანიჭოს. ათასწლეულებია, რაც სახლის პირობებში, ყველაზე ხშირად, ადამიანის ერთგულ მეგზურად ძაღლი და კატა გვხვდება. მიუხედავად იმისა, რომ მათთან გატარებული დრო დადებითი ემოციებით გვავსებს და ჩვენს ყოველდღიურობას განსაკუთრებულ ელფერს სძენს, არის საკითხები, სადაც შინაურ ცხოველთან თანაცხოვრება დიდი თავსატეხის მიზეზი ხდება - მაგალითად, მაშინ, როცა ჩვენი ოთხფეხა მეგობრები თავიანთ კვალს ყველა ტიპის ავეჯსა თუ ტანსაცმელზე, ბეწვის სახით ტოვებენ. სწორედ ამიტომ, ამ ბლოგში საინტერესო ხრიკებს მსგავსი თავსატეხისგან გასათავისუფლებლად გასწავლით:
შედარებით პატარა ზომის ავეჯისთვის, ლატექსის ხელთათმანი ძალიან კარგი გამოსავალია. გაიკეთეთ ხელთათმანი ხელზე და გადაუსვით თმით დაფარულ ზედაპირს. ხელთათმანი ბეწვს მიიკრავს და მარტივად შეძლებთ ავეჯის გაწმენდას. უფრო მეტიც, თუ ხელთათმანს წყლით დაატენინაებთ, მეთოდი უფრო ეფექტური იქნება. გარდა ლატექსის ხელთათმანისა, ეს ტაქტიკა კარგად მუშაობს რეზინის ან მებაღეობის ხელთათმანითაც.
ტახტებისა და დიდი ზომის ავეჯისათვის, კარგი გამოსავალია ავეჯისატის განკუთვნილი ანტისტატიკური სპრეის გამოყენება. ანტისტატიკური სპრეი კარგად დააპკურეთ ავეჯის სხვადასხვა მონაკვეთზე და შემდეგ, სუფთა ნაჭრით ჩამოწმინდეთ მატერია. ბეწვი მარტივად მოშორდება ავეჯს და შესაბამისად, სახლში სისუფთავეც შენარჩუნდება. უკეთესი ეფექტისათვის, შეგიძლიათ ნოტიო ნაჭერი გამოიყენოთ.
ხშირად, ძალიან კომფრტულია ხელის ჯაგრისის გამოყენება, რომელსაც როგორც წესი, თავისივე აქანდაზი მოყვება. ხელის ჯაგრისის გამოყენებისას, ავეჯი წინასწარ დანამეთ, რათა ჯაგრისმა ბეწვი პირველივე მოსმაზე მარტივად აიღოს. აქანდაზი კი უზრუნველყოფს, რომ აღებული თმა იატაკზე არ მოხვდეს და შედეგად, რაც შეიძლება ნაკლები დრო და ენერგია მოხმარდეს სახლის დალაგებას.
გარდა ავეჯისა, ცხოველის ბეწვი აქტიურად ეკრობა ჩვენს ტანსაცმელსაც, რაც ხშირ შემთხვევაში დიდი პრობლემა ხდება. ხშირად, რთულია მარტივი გზა ვიპოვოთ ბეწვისაგან თავის დასახსნელად. მიუხედავად იმისა, რომ სპეციალურად ცოხველის ბეწვისათვის განკუთვნილი წებოვანი ლენტა უკვე მრავალი წელია არსებობს, მის ეფექტურობასთან დაკავშირებით კითხვები მაინც ჩნდება მაშინ, როცა საქმე ტანსაცმლის ბეწვისაგან სრულად გაწმენდას ეხება. თუმცა, თანამედროვე სამყარო უკვე გვთავაზობს ბეწვის მოსაშორებელ სპეციალურ რეზინებს, რომელსაც წებოვან ლენტასთან გამოყენების შემთხვევაში საუკეთესო შედეგი აქვს. პირველ რიგში, ტანსაცმელს ზედაპირულად ასუფთავებთ წებოვანი ლენტით, შემდეგ კი სარეცხი მანქანაში ტანსაცმელთან ერთად, სპეციალურ რეზინებს შეაგდებთ, რაც თმას იკრავს და რეცხვის შემდგომ, კვლავ ცხოველის თმიტ სავსე ქსოვილი წარსულს ბარდება.
მაშინ, როცა ამ რჩევების გათვალისწინებით, ავეჯის გასუფთავება ძალიან მარტივი გახდა, მნიშვნელოვანია არც იატაკი დაგვავიწყდეს, სადაც ყველაზე მეტი მტვერი და მათ შორის, ცხოველის ბეწვი ხვდება. რა თქმა უნდა, მტვერსასრუტი ყველაზე მძლავრი საშუალებაა მტვერისა და ბეწვის ასაღებად, განსაკუთრებით ხალიჩების გასუფთავებისას. თუმცა თუ კონკრეტულ შემთხვევებში (ქვის ზედაპირის, კაფელისა და ლამინატის გასამწენდად) პრობლემის სწრაფი გადაწყვეტა გვჭირდება, საუკეთესო საშულებაა კარგად გაწურული ღრუბელის მოპის გამოყენება. ღრუბელის მოპი მტვერის ყველაზე მცირე ნაწილაკებთან ერთად, ძალიან ეფექტურად იკრავს ჩვენი ოთხფეხა მეგობრების ბეწვსაც. ამ გზით, სულ რამდენიმე წუთშია შესაძლებელი იატაკის გასუფთავება.
როგორც ხედავთ, ცხოველის თმა დიდი თავსატეხი სულაც არ არის, თუ ზუსტად იცი, როგორ მიუდგე საკითხს. ამიტომაც, თუ ამ რჩევებს გაითვალისწინებთ, ცხოველის ბეწვისაგანაც დაისვენებთ და თქვენს საუკეთესო მეგობრებთან ერთად ყოველდღიური თანაცხოვრება ბევრად უფრო კომფორტული გახდება.
