ნაქირავები სახლის მოწყობაზე ფიქრისას, შესაძლოა უამრავი დაბრკოლება წარმოგიდგეთ თვალწინ, ვინაიდან გამქირავებლების უმეტესობა, ძირეული ცვლილებების უფლებას არ იძლევა. ამას, რა თქმა უნდა, თავისი ახსნა და გასაგები მიზეზი აქვს, თუმცა მათთვის ვინც ბინას ქირაობს, სახლურობის შეგრძების შექმნა იმ შტრიხებით, რომლებსაც თავად შემატებენ ნაქირავებ ქონებას, ძალიან მნიშვნელოვანია. ამიტომაც, კარგი ამბავია ის, რომ სახლის მოწყობა და საკუთარ ხასიათსა თუ შინაგან სამყაროზე მორგება, რაიმე არსებითის ცვილების გარეშეც ძალიან მარტივად შეიძლება. ამ ბლოგში, სწორედ იმ მარტივ რჩევებს გაგაცნობთ, რომელთა გათვალისიწნებაც თქვენს ნაქირავებ სივრცეს უფრო მეტად თქვენებურსა და ორიგინალურს გახდის:
მიუხედავად იმისა, ახლა გყავთ თუ არა სახლის მცენარე, გაითვალიწინეთ, რომ სახლში ყოველთვისაა ადგილი ერთით მეტი მწვანე მეგობრის შესაძენად. სახლის მცენარეები ანათებენ ოთახს, სიცოცხლეს მატებენ სივრცეს და რაც მთავარია, აუმჯობესებენ ჩვენს ჯანმრთელობას. მონსტერა დელიციოზა, ფიკუს ელასტიკა, ჰოვეა ფორსტერა და სფატიფილიუმი, იმ ყვავილების ჩამონათვალია, რომლებიც მარტივად მოსავლელიცაა და თან, ნებისმიერი ტიპის ინტერიერს ამშვენებს.
ლინოლეუმის იატაკი, უსიცოცხლო ხის დაფები, თუ უბრალოდ ნაკლებად ხალისიანი ერთიანი იერსახე, - ნებისმიერ შემთვევაში, ფარდაგი, რომელიც ვიზუალურად გამორჩეული ელემენტებითა და დიზაინით თავისთავად განაცხადია, მარტივად მოაგვარებს ამ პრობლემას. შესაბამისი ხალიჩის შერჩევა ნებისმიერი გემოვნების ადამიანისთვის ძალიან მარტივია, ვინაიდან ფარდაგები ხელმისაწვდომია სხვადასხვა პრინტითა და ფერთაგამით. მთავარია, გაითვალისწინოთ ავეჯის ზომა და სივრცის განლაგება, რათა თავიდან აირიდოთ ყველაზე გავრცელებული შეცდომა - პატარა ზომის ხალიჩის შეძენა.
თუ სივრცეს ბუნებრივი სინათლე აკლია, ასეთ დროს საუკეთესო გამოსავალია ოთახის კუთხეში სანათების დადგმა. იმისათვის, რომ სანათი უფრო ფუნქციურ ელემენტად აქციოთ და არა მხოლოდ აქსესუარად, შეიძინეთ სანათი რომელიც ინტერიერის გამორჩეული ელემენტი გახდება. გარდა ამისა, იფიქრეთ მათ დანიშნულებაზე სახლის სხვადასხვა კუთხისა და ოთახისთვის. მაგალითად, მცირე ზომის მაგლიდის სანათები შუქის ფოკუსიერებას კარგად შეძლებენ, თუ სანათი საძნებელში წიგნის წასაკითხად გჭირდებათ, ხოლო სამყოფი ოთახის ტორშერები საღამოობით განსაკუთრებით ამყუდროვებენ სივრცეს, სადაც დიდ დროს ატარებთ.
მულტიფუნქციურ ავეჯს შეუძლია როგორ თანხა, ასევე ადგილიც დაზოგოს და ამასთანავე, ოტახს სხვადასხვა ფუნქციაც შესძინოს. ამიტომაც, სასურველია, ინვესტიცია მოქნილ და ესთეტიკურად მომნუსხველ ავეჯში ჩადოთ, რომელიც თქვენს საჭიროებებსა და მოთხოვნილებებს სრულად უპასუხებს.
გარდა ამისა, მულტიფუნქციური ავეჯი განსაკუთრებით სასარგებლოა მაშინ, თუ მცირე მოცულობის ფართზე გვაქვს საუბარი. მაგალითად, სასადილო მაგიდა, რომელსაც დღის განმავლობაში შეუძლია კუთხის სამუშაო სივრცე იყოს, ხოლო საღამოს ადამიანების თავშეყრისა და გემრიელი საუბრების ადგილი.
როგორც ხედავთ, ნაქირავები სახლიც შეიძლება ისე მოვაწყოთ, რომ არსებითი და ძირეული ცვლილებები არ შევიტანოთ, თუმცა სივრცე მაინც ჩვენებურად ვაქციოთ. ამისათვის, მხოლოდ ცოტაოდენი დაკვირვება და ზემოთ ჩამოთვლილი რჩევების გათვალისწინება დაგჭირდებათ, რაც არც დიდ ბიუჯეტს მოითხოვს და შესრულების კუთხითაც, ძალიან ხელმისწავდომია.
