დახურვა

ეკლექტიკა ინტერიერში

გაზიარება
დამატების თარიღი: 14 აპრილი, 2021


უჩვეულო და ორიგინალური ეკლექტიკა ინტერიერის დიზაინში, საცხოვრებელ თუ სამუშაო სივრცეში, წარმოსახვით სავსე, მყუდრო ატმოსფეროს ქმნის. სტილებს შორის, ერთ-ერთი ყველაზე რთულია, მაგრამ ყოველთვის თვალშისაცემი. მსოფლიოს გარშემო, ყველა დიდი ქალაქი ემორჩილება ეკლექტიზმის ხიბლს, ხოლო დიზაინის მოყვარულები სახლში სიმყუდროვის შესაქმენლად სწორედ მას ანიჭებენ უპირატესობას.



თუ გავითვალისწინებთ, რომ “ეკლექტიკა” წარმომავლობით ძველ საბერძნეთს მიეკუთვნება და რჩეულს, საუკეთესოს ან შერჩევას აღნიშნავს, მის როლსაც ადვილად გავიაზრებთ ხელოვნებაში, მათ შორის ინტერიერის დიზაინშიც. ამასთან, ეკლექტიკა, საუკეთესოს გამოვლენასთან ერთად, იმ ოსტატობასაც მოიაზრებს, რომელიც არჩეულ ელემენტთა ჰარმონიულ სინთეზს ქმნის.

ეკლექტიკურ სტილში მოწყობილი ბინა კომფორტულია, ლამაზი და უნიკალური. მთავარი პრინციპი, საბაზისოდ ორ-სამი სტილის შერჩევა (როგორც წესი, ისტორიული სტილების) და მათი მახასიათებლების ერთმანეთთან დაკავშირებაა. უფრო მეტი სტილის შერევით კი “კიჩ”- ი მიიღება, რომელიც უკვე სრულიად სხვა სტილია. 

ეკლექტიკის ზოგადი მახასიათებლები:

●     2-4 სტილის ნაზავი;

●     ეფუძნება კლასიკურ-ისტორიულ სტილებს, ან მათ იმიტაციას;

●     გამოიყენება სხვადასხვა დეკორაციული მასალა: ხე, ქვა, მეტალი, შუშა, ქსოვილი. შესაძლებელია პლასტმასიც, თუ არ დაარღვევს ჰარმონიას;

●     ეკლექტიკა არ მოიცავს მკვეთრი ფერების სიჭარბეს. როგორც წესი, ფონისთვის არჩევ ღია ტონებს, ხოლო ავეჯისთვის ბუნებრივ ფერებს;

●     სტილისტური ელემენტები (ავეჯი, დეკორი, ფერები, ტექსტურა, მასალა) ორგანულად თავსებადია და ერთმანეთთან დაბალანსებული. ეკლექტიზმის საყრდენი არის ჰარმონია. აქ ნაკლები ადგილია ექსპერიმენტისთვის, რადგან ქმნი ახალს ნაცნობი სტილების საფუძველზე;

●     ეს სტილი საკმაოდ ინტიმურია, ორიგინალური, ინოვაციური, ერთდროულად კლასიკური და ვინტაჟური. ახასიათებს ფუნქციონალურობა, მკვეთრი ფორმები და რბილი ხაზები.



ეკლექტურ ინტერიერში ფაქტიურად ნებისმიერ ფერს შეხვდებით. კედლებისთვის, ჭერისთვის და იატაკისთვის ხშირად არჩევენ თეთრ, ღია კრემისფერ, ნეიტრალურ ფერებს. დამატებითი აქცენტებისთვის: ნაცრისფერს, ცისფერს, ვარდისფერს, ბაცი ინდიგოს, ყავისფერს ან შინდისფერს. აქაც, მთავარია, ყველა შეფერილობა ერთმანეთს ჰარმონიულად ერწყმოდეს და ხელს უწყობდეს სივრცის, როგორც ერთი მთლიანობის აღქმას.  



თანამედროვე ეკლექტიკაში, ავეჯს ყოველთვის წამყვანი ადგილი უჭირავს. შედარებით მეორეხარისხოვანია ის დეკორატიული ნივთები, რაც დარჩენილ სივრცეს ავსებს.

როგორც ფერში, აქაც მთავარი ბალანსია, ავეჯი, დეკორი და ქსოვილები ერთი განსაზღვრული იდეით უნდა იყოს ერთმანეთთან დაკავშირებული. მაგალითად, მისაღებ ოთახში, შეიძლება განათავსო ბაროკოს სტილის მაგიდა, პროვანსისა და შები შიკის სხვადასხვა ზომის სავარძლები, თუ ამ ყველაფერს ერთ საერთო თვისებას მიანიჭებ, ფერის  ან საერთო დეკორის სახით.

ეკლექტიკურ ინტერიერში ოთახის გასაფორმებლად იყენებენ: ქოთნებს, ვაზებს, ნახატებს, ხალიჩებს, ბალიშებს, ანტიკვარიატს, ქანდაკებებს, შანდლებს და სხვა, ძველებურ თუ თანამედროვე წვრილმანებს.

შესანიშნავი დანამატია ნებისმიერი სახისა და სტილის სანათი, ბრა, ჭაღი თუ ტორშერი ფერად-ფერადი აბაჟურებით.



ეკლექტიკა, როგორც არქიტექტურული სტილი, ოფიციალურად მე-19 საუკუნის 30-იან წლებში აღიარეს და აქტიურად გამოიყენებოდა მე-20 საუკუნის დასაწყისამდე. მისი ძირითადი პრინციპებია კლასიკური არქიტექტურის ხისტი ფორმების ალტერნატივის მოფიქრება და შენობების ფუნქციონირების გაზრდა. თითოეული შენობა გამოირჩევა თავისი უნიკალური სტილით.

ეკლექტიკა ინტერიერის დიზაინის სფეროში შემოვიდა როგორც წესებისა და კანონების უარყოფის ფორმა, როგორც თვითრეალიზაციის მიმდინარეობა, გამოხატვის თავისუფლება და როგორც სივრცე, სადაც სხვა სტილებიდან აღებული საუკეთესო ელემენტები ერთმანეთს კიდევ უფრო წარმოაჩენდა და გაალამაზებდა.

არქიტექტურაში, ეკლექტიკის ერთ-ერთი უმთავრესი და უპირველესი ნიმუში არის პენას სასახლე ქალაქ სინტრაში (პორტუგალია). აქ კარგად არის წარმოდგენილი სხვადასხვა არქიტექტურული სტილის ნაზავი ერთ ნაგებობაში.


შთაგონებისთვის გიზიარებთ მე-20 საუკუნის ერთ-ერთი გამორჩეული დიზაინერის დოროთი დრეიპერის (პირველი ინტერიერის დიზაინ სტუდიოს დამფუძნებელი) სიტყვებს:

“რატომღაც ყველას სჯერა, რომ ინტერიერის გაფორმებაში არის რაღაც ღრმა და იდუმალი, რომ თუნდაც თითის გასანძრევად საჭიროა ყველა სახის რთული დეტალების ცოდნა სხვადასხვა პერიოდის შესახებ. სულაც არა! დეკორირება ერთი დიდი გართობაა: ფერით აღტაცება, წონასწორობის გაცნობიერება, განათების შეგრძნება, სტილის აღქმა, სიცოცხლის სურვილი და მომხიბვლელი აქსესუარებით თამაში.”

ეკლექტიკაც, სხვა არაფერია, თუ არა თამაში ფერებით, სტილებით და რაც მთავარია - საკუთარი წესებით.

ეკლექტიზმის იდეები არასოდეს დაკარგავს აქტუალობას მისი უნივერსალიზმის გამო. შეიძლება ბევრს აერიოს ის უძველეს სტილებში, მაგალითად ბაროკოში, ან წარმოიდგინონ ექსტრავაგანტულ ნეოკლასიციზმად, მაგრამ კიდევ ბევრ თაობას გასწვდება თავისი უნიკალურობის გამო.

სხვა ბლოგები