დახურვა

კლასიკური სტილი ინტერიერში

გაზიარება
დამატების თარიღი: 24 მაისი, 2021

რომელი სფეროც არ უნდა ავიღოთ, სიმყუდროვისა და ესთეტიზმის “თავშესაფარი” კლასიკაა. კლასიკური სტილი ინტერიერში რეალურად დროში გამოცდილი სტილების (ანტიკური, ამპირი, ბაროკო, როკოკო) მემკვიდრეობაა.

კლასიკური ინტერიერი ყოველთვის გამოირჩევა ბუნებრივი სამშენებლო მასალებით, სწორი გეომეტრიით, სიმეტრიულობით, ავეჯისა და დეკორაციის ერთმანეთთან ჰარმონიული კავშირით, სინათლის წყაროების სიმრავლითა და ეროვნულობის ანაბეჭდით.

კლასიკას არ ეხება ტრენდები. კლასიკური სტილი ინტერიერში დიდი ხნით დაგაკმაყოფილებთ და შესაძლებელია, რომ გარკვეული დროის შემდეგ, რაიმეს რადიკალურად შეცვლის სურვილი საერთოდ არ გაგიჩნდეთ.  

ელეგანტური კლასიკური სტილი ინტერიერში ხაზს უსვამს მფლობელის გემოვნებას და მის ტრადიციებისადმი დამოკიდებულებას. რესპექტაბელურობასთან ერთად, განსაკუთრებულად მყუდროა და არაა მოწყვეტილი პრაქტიკულობას. დროთა განმავლობაში კი, როგორც ყველაფერი კლასიკური, ინტერიერიც უფრო ძვირფასი ხდება.



ნებისმიერი სტილისა თუ მიმდინარეობის გამორჩეული ვარიაცია, ყველაფერი საუკეთესო, რასაც ადამიანი ქმნის, რისი ხარისხიც, ფუნქციონალურობა და ესთეტური ღირებულება დროშია ნაცადი არის კლასიკა.



კლასიკურ ინტერიერში ავეჯი ბუნებრივი მასალისგან არის დამზადებული და ხშირად ანტიკვარული ავეჯიც გამოიყენება. სტილს შეეფერება გლუვი ფორმები, ზედმეტი ხვეულების გარეშე. რბილი ავეჯი ელეგანტური და კომფორტულია, გადასაკრავად იყენებენ ბუნებრივ აბრეშუმს, ხავერდს და ბამბას.  



სტილი წარმოუდგენელია მასიური ბროლის, ჭედური ჭაღების და მხატვრულად შესრულებული ორიგინალური ბრების გარეშე. დიდი ყურადღება ეთმობა ბუნებრივ განათებასაც, ანუ ფანჯრებს. ვიტრაჟებიც აქტუალურია. მაგიდის ლამფები და ტორშერები ისეა განლაგებული, რომ კომფორტულად მოკლათდე სავარძლეში, ან ჟურნალის მაგიდასთან წიგნის წასაკითხად.



სტილისთვის დამახასიათებელია ბუხარი, ფაიფურის, ბრინჯაოსა და ვერცხლის ნაკეთობები, შანდლები, ქანდაკებები, დასადგამი საათები, ვაზები, ჩარჩოებში ჩასმული სარკეები, ნახატები და სხვა ანტიკვარული ნამუშევრები. იატაკზე დაგებული აბრეშუმის, თუ შალის ხალიჩა მეტ სითბოს მატებს სივრცეს.  



კლასიკურ ინტერიერში არაფერია ზედმეტად მყვირალა და კაშკაშა, ფერებიც მშვიდია, ჰარმონიული, ხშირად ბეჟი შერწყმული შოკოლადისფერთან, კრემისფერი მუქ ლურჯთან, ნაცრისფერი ბაც მწვანესთან, ღია ყავისფერი შინდისფერთან. ბეჟი ფერის ტონალობები ყველაზე ხშირი არჩევანია კლასიკურ ინტერიერში.  




კლასიკურ ტრადიციებში გადაწყვეტილ ინტერიერს გამოარჩევს დახვეწილად ჩამოსხმული “სტუკო”, ანუ დეკორაციული ბათქაში. კედლებსა თუ ჭერზე, აქტიურად გამოიყენება ყველა სახის ყალიბი, ჩარჩო, ფრიზი… დეკორირების გარდა, სტუკო სივრცესაც ქმნის: კედელს ყოფს თანაბარ ნაწილებად, ხაზს უსვამს ჭერის სიმაღლეს და აბალანსებს ოთახის პროპორციებს.



კლასიკური სტილი ინტერიერში, ევროპაში, მე -17 საუკუნეში გაჩნდა. იმ დროისთვის უკვე საკმაოდ გავრცელებული იყო ბაროკო და როკოკო. ანტიკური კულტურითა და იტალიის არქიტექტურით მოხიბლულმა შოტლანდიელმა არქიტექტორმა, რობერტ ადამმა, შეიმუშავა ინტერიერის დიზაინი, რომელიც თავისი დახვეწილობით არ ჩამოუვარდებოდა როკოკოს. ახალ სტილს რაციონალიზმი, ლაკონურობა, მონუმენტალიზმი, განლაგების პროპორციონალურობა და ზედმეტი ელემენტებისგან თავშეკავება ახასიათებდა. პირველადი კლასიკური სტილის თვალსაჩინო ნიმუშია ვერსალის სასახლე.

სხვა ბლოგები