რა უნდა გაითვალისწინო, როცა საცხოვრებელი ბინის სართულს არჩევ

გაზიარება
დამატების თარიღი: 24 აგვისტო, 2022

როდესაც საცხოვრებელი სახლის ყიდვას ეხება საქმე, ყოველთვის უამრავი დეტალი უნდა გაითვალისწინო. მათ შორის, ადგილმდებარეობა, ფასი, დაშორება პარკირებისა და საზოგადოებრივი ტრანსპორტის გაჩერებებიდან და რა თქმა უნდა, თავად კორპუსის ხარისხი. 

 

თუმცა, ამ ყველაფერთან ერთად არის ერთი არანაკლებ მნიშვნელოვანი დეტალი, რომელიც მხედველობიდან არ უნდა გამოგრჩეს. ამ ფაქტორის გათვალისიწინებამ, ყოველდღიური ცხოვრების ხარისხზე ძალიან დიდი გავლენა შეიძლება იქონიოს. რაც ნიშნავს, რომ სახლის შეძენისას აუცილებლად კარგად უნდა დაფიქრდე, თუ რომელი სართულია საუკეთესო შენთვის. 

 

თითოეულ სართულზე ცხოვრებისას, არსებობს უამრავი დადებითი და უარყოფითი მხარე, რომელიც პირველი სართულიდან ბოლო სართულამდე შეგხვდება. 

 

მაშ, ასე: 



საცხოვრებელი სახლის შერჩევისას, თუ მხედველობის არეში ბოლო, ანუ ყველაზე მაღალი სართული მოხვდა, მაშინ პირველი, რაც უნდა გაითვალისწინო არის ლიფტის არსებობა. სხვაგვარად, გადააადგილება, განსაკუთრებით მაშინ, თუ სახლს აქტიურად ტოვებ, საკმაოდ რთული იქნება და დიდ დისკომფორტს შეგიქმნის. ეს ყველაზე მარტივი ჭეშმარიტებაა. ხოლო, რაც შეეხება უპირატესობებს:


ნაკლები ხმაური


ბოლო სართულის ბინებს იშვიათად თუ უწევთ გაუმკლავდნენ იმ ხმაურს, რომელიც ქუჩისა და სხვა მაცხოვრებლებისგან მოდის. თუმცა, თუ თავად ხარ ხმაურიანი მეზობელი, მაშინ ბოლო სართულზე ცხოვრებამ, შესაძლოა, პრობლემები ქვედა სართულის მეზობლებთან შეგიქმნას. 


ქალაქის პანორამული ხედი


პანორამული ხედი, რომელიც ქალაქს გადაჰყურებს იმ ფაქტორებს მიეკუთვნება, რომელთა შესახებაც ბოლო სართულის მაცხოვრებლები ნამდვილად ვერ დაიწუწუნებენ. თუმცა, მნიშვნელოვანია ისიც გახსოვდეს, რომ აუცილებელი სულაც არ არის მხოლოდ და მხოლოდ პენტჰაუსში ცხოვრობდე იმისათვის, რომ ბინის ფანჯრებიდან ქალაქის ხედი იხილო. თუ კორპუსის ადგილმდებარეობა ამის საშუალებას იძლევა, მის შუანაწილში განთავსებული ბინებიც შესაძლოა მშვენიერ ხედებს გთავაზობდნენ. რაც მთავარია, მაღალ სართულზე განლაგებულ ბინებს მეტი წვდომა აქვთ მზის ბუნებრივ განათებასთან, რაც გეხმარება დაზოგო ელექტროენერგიის ხარჯები და ინტერიერში ლამაზი ფერებიც შეიტანო. ასეთ შემთხვევაში, შუა სართულის შეძენისას, პირველ რიგში, ზოგავ თანხას, ისე, რომ ჩამოთვლილ უპირატესობებს ინარჩუნებ, რადგან ბოლო სართულები ყოველთვის უფრო ძვირი ღირს. 



ნაკლები მავნებელი


მაღალ სართულზე ცხოვრება, ნიშნავს ნაკლებ არასასურველ ვიზიტორს ბინაში. მაგალითად, ნაკლებ მავნებლებსა და მწერებს. ხოჭოები და სხვა მსგავსი მწერები, უმეტესად სარდაფებსა და პირველ სრთულებზე ბინადრობენ. შესაბამისად, მეტია შანსი, რომ ისინი ესტუმრონ მათ, ვინც დაბალ სართულზე ცხოვრობს. 

 

ხოლო, უარყოფითი მხარეები შემდეგია: 


ევაკუაციის შეზღუდული შესაძლებლობები


მაღალ სართულზე ცხოვრებამ, ხშირ შემთხვევაში, შესაძლოა გაართულოს გადაუდებელი ევაკუაცია ხანძრის ან ბუნებრივი სტიქიური მოვლენების დროს. თუ ბინის შეძენას მაღალ სართულზე აპირებ, გაითვალისწინე, რომ წინასწარ გაეცნო კორპუსის ევაკუაციის გეგმასა და გზამკვლევს. 


მაღალი ფასი


ორი ერთმანეთის მსგავსი ბინა, რომელთა განლაგებაცა და რემონტიც იდენტურია, შესაძლოა ფასის მიხედვით საგრძნობლად განსხვავდებოდეს როგორც ყიდვის, ასევე ქირაობის შემთხვევაში. ამის მიზეზი კი არის ის, რომ მაღალი სართული ყოველთვის უფრო ძვირი ღირს. ასევე, გასათვალისწინებელია კლიმატისა და იმ რესურსების ხარჯებიც, რომელსაც ბინაში ცხოვრებისას მოიხმარ. მაგალითად, თუ სახლს ბოლო სართულზე შეარჩევ და კლიმატი საკმაოდ თბილია, გაითვალისწინე, რომ ზაფხულში ელექტროენერგიის ხარჯები საგრძნობლად გაგეზრდება. ცივი ზამთრის შემთხვევაში კი, გათბობის საფასური იმატებს. 



პირველ სართულზე ცხოვრება შესაძლოა იმდენივე გამოწვევას გულისხმობდეს, რამდენი დადებითი მხარეც აქვს. ამის გათალისწინებით, რამდენიმე მნიშვნელოვანი ფაქტორი არ უნდა გამოგრჩეს. მათ შორის, დადებითი მხარეებია: 


მოსახერხებელი განლაგება


პირველ სართულზე ცხოვრება იდეალურია მძიმე ტვირთის, ნივთებისა და პროდუქტების გადაზიდვასთან გასამკლავებლად. მაგალითად, ავეჯის გადატანა ან, თუნდაც, ხილ-ბოსტნეულის მაღაზიაში გატარებული დიდი მოგზაურობის შემდეგ, სახლში დაბრუნება. ასევე, თუ ჯანმრთელობის მდგომარეობა კიბეებზე ხშირ ასვლა-ჩამოსვლაში ხელს არ გიწყობს, ასეთ დროს, პირველი სართული შესაძლოა საუკეთესო გამოსავალიც კი იყოს. 


ნაკლები კომუნალური გადასახადები


დაბალი სართული ძალიან ეფექტური საშუალებაა კომუნალური მომსახურებებისთვის განკუთვნილი ყოველთვიური ხარჯების დასაზოგად. რაც უფრო დაბლაა სართული, სახლის საზაფხულო გაგრილებისთვის უფრო ნაკლები თანხა იხარჯება. ამის მიზეზი კი არის ის, რომ ზაფხულში გრილი ჰაერი ბუნებრივად მიედინება ქვემო სართულებისკენ. 


სიახლოვე გარე სივრცეებთან


პირველ სართულზე ცოხვრება, ხშირ შემთხვევაში, ნიშნავს მარტივ ხელმისაწვდომობას ეზოებსა და სკვერებთან. ასეთი მდებარეობა, განსაკუთრებით კომფორტულია მათთვის, ვისაც შინაური ცხოველი ჰყავს და შესაბამისად, ხშირად უწევს ბინიდან მისი გაყვანა სეირნობის თუ სხვა მიზნებისთვის. 

 

და რაც შეეხება უარყოფით მხარეებს:


მეტი ხმაური


მიუხედავად იმისა, რომ ქუჩასთან სიახლოვე პირველი სართულისთვის, რაღაც კუთხით, დადებითი თვისებაა, ასევე არის უარყოფითიც იმ შემთხვევაში, თუ სახლის ფანჯრები პირდაპირ ქუჩას გადაჰყურებს. ვინაიდან, ამ შემთხვევაში, აუცილებლად მოგიწევს შეეგუო ავტომობილების ძრავის ხმაურს გვიან ღამითაც კი. 


მეტი მავნებელი


მათთვის ვინც სახლს ქირაობს, ხშირად, გადაწყვეტილების შეცვლას სწორედ ის აიძულებთ, რომ ბინის პირველ სართულზე ბევრი მწერი და მავნებელი შეიძლება მოხვდეს. შესაბამისად, თუ ბინის ქირაობას ან ყიდვას პირველ სართულზე აპირებ, კარგად შეისწავლე რამდენად გამართულია კორპუსის სადარბაზო: არის თუ არა დახურული ყველა არასასურველი ხვრელი, იცავენ თუ არა სადარბაზოს სანიტარულ ნორმებს, და რაც მთავარია, არ დაგავიწყდეს, რომ უმეტესად, გარედან შემომსვლელ მწერებთან საბრძოლველად, ძალიან კარგი მეთოდია კარისა და ფანჯრის ბადეების დაყენება. 

 

რაც შეეხება შუა სართულებს, ისინი აერთიანებენ იმ თვისებების უმეტესობას, რომელიც დაბალ და მაღალ სართულებს ახასიათებს. მთავარია, დააკვირდე, შუამდებარე სართულები კორპუსის ზედა ნაწილთან უფრო ახლოსაა, თუ ქვედასთან. 

 

საბოლოოდ, როცა ბინის სართულის შერჩევას გადაწყვეტ, ვფიქრობთ, ეს ბლოგი ძალიან დაგეხმარება. 


ლივოს ბლოგი

სხვა ბლოგები