სახლის ყიდვის დროს, შეიძლება უფრო მეტი ყურადღება ეზოს ზომას, ოთახების განლაგებას ან სამზარეულოს სიდიდეს მიანიჭოთ, მაგრამ სახლს სხვა, უფრო მნიშვნელოვანი მახასიათებლებიც აქვს, რაც აუცილებლად გასათვალისწინებელია.
ახალი აშენებული ბინის ყიდვის დროს, დააზუსტეთ შენობის კონდიცია არა მხოლოდ შიდა პერიმეტრზე, არამედ სადარბაზოსა და ეზოს კეთილმოწყობის მხრივ. დააზუსტეთ საინჟინრო ქსელებისა და კედლების მდგომარეობა. თუ სახლს დეველოპერული კომპანიისგან შეიძენთ, კომპანიას გამოართვით ინფორმაცია სამშენებლო მასალებზე: აკმაყოფილებს თუ არა მოცემული მასალა თანამედროვე სტანდარტებს, რამდენად უზრუნველყოფს შენობის სიმყარეს, ეკოლოგიურობასა და ენერგოეფექტურობას.
თუ კერძო სახლს ყიდულობთ, განსაკუთრებული ყურადღება მიაქციეთ სახურავის მდგომარეობას. ისიც გაითვალისწინეთ, რომ სტანდარტულად, სახურავს ყოველ 20-25 წელიწადში გამოცვლა სჭირდება. სახურავის შეკეთება, თუ გამოცვლა საკმაოდ დიდი ხარჯია და არც ისე სასიამოვნო იქნება თუ ამ ხარჯის გაწევა სახლის შეძენისთანავე მოგიწევთ.
ისეთი მცირე პრობლემები, როგორიცაა გაცრეცილი საღებავი, ან გატეხილი ნათურა, ზედმეტი ძალისხმევისა და ხარჯის გარეშე გამოსწორდება, მაგრამ თუ სახლის საძირკველია დაზიანებული, ძვირადღირებულ სარემონტო სამუშაოებს თავს ვერ აარიდებთ. დაზიანების თვალსაჩინო ნიშნები საძირკველთან ახლოს არსებული ბზარებია, როგორც სახლის შიგნით, ისე - გარედან. ყურადღება მიაქციეთ იატაკსაც. მისი უსწორმასწორობა, როგორც წესი, საძირკველის დაწევას მიანიშნებს.
შეიძლება ძალიან მოგეწონოთ სახლი იმის გამო, რომ ის წყალთანაა ახლოს, მაგრამ აუცილებლად გაითვალისწინეთ ამ სიახლოვის რისკებიც.
რაც უფრო ახლოს ხართ წყალთან, მით უფრო მეტია დატბორვის ალბათობა, განსაკუთრებით წელიწადის წვიმიან დროს.
აუცილებლად დააკვირდით წყალგაყვანილობის სისტემას. მილებზე არსებული ობი შესაძლოა მიუთითებდეს, რომ სისტემა გამოსაცვლელია,
გადაამოწმეთ სახლის იზოლაციის მდგომარეობა, განსაკუთრებით მაშინ თუ შენობა რამდენიმე ათეული წლის წინ აშენდა. რაც უფრო კარგია სახლის იზოლაცია, მით უფრო ენერგოეფექტური იქნება შენობა გათბობა-გაგრილების თვალსაზრისით. მოძველებულმა, ან არაეფექტურმა იზოლაციამ შეიძლება არასასიამოვნო კლიმატი შექმნას თქვენს სახლში - რომ აღარაფერი ვთქვათ ენერგიის გადაჭარბებულ მოხმარებაზე.
დააკვირდით ბინის ბუნებრივი განათების, განიავების, გათბობის შესაძლებლობებს, ასევე - დამონტაჟებულია თუ არა კონდიციონერი და გათბობის ქვაბი, ან გამოყოფილია თუ არა მათთვის ცალკე ადგილი.
შეიძლება მზად იყოთ, გადაიხადოთ სახლის პირველადი შენატანი, ყოველთვიური იპოთეკური გადასახადი და პროცენტები, მაგრამ არსებობს ისეთი ხარჯებიც, რომელთა შესახებ შესაძლოა არც იცოდეთ. მაგალითად რეგულარული შესაკეთებელი-სარემონტო სამუშაოების, დასუფთავება, ინფრასტრუქტურული ხარჯები, დაცვა და სხვა წვრილმანი გადასახადები წლის ბოლოსთვის საკმაოდ დიდ თანხამდე ადის.
სახლს რომ დაათვალიერებთ, სამეზობლოც გაიცანით. გადახედეთ ამ უბანში არსებული გასაყიდი ბინების ჩამონათვალს და მათ საშუალო ფასს.
ასევე დააკვირდით, არის თუ არა გარშემო, ფეხით სავალ მანძილზე, გაჩერება, მეტროს სადგური, პარკები, სასურსათო მაღაზიები, სკოლები, ბაღები და თქვენთვის საინტერესო დანიშნულების ადგილები. ინფორმაცია გასაყიდ უძრავ ქონებასთან ახლოს მდებარე ობიექტებზე შეგიძლიათ ნახოთ www.livo.ge -ზე. დეველოპერული კომპანიის შესახებ ინფორმაციას ყველაზე კარგად უკვე დასახლებული მაცხოვრებლები გეტყვიან. კარგი იქნება, თუ მათ შთაბეჭდილებებსაც გაეცნობით.
იმის მიხედვით, იგეგმება თუ არა მომავალი მშენებლობა, გეცოდინებათ რა პერსპექტივა ელის არამარტო ხედს აივნიდან, არამედ ჰაერის სისუფთავეს და უბნის სიწყნარეს.
მნიშვნელოვანია, რომ ნასყიდობის გაფორმებისთვის საჭირო ყველა საბუთი იყოს წესრიგში და მოხდეს უძრავი ქონების იურიდიული შემოწმება.
საიდენტიფიკაციო საბუთებთან ერთად დაგჭირდებათ: ამონაწერი საჯარო რეესტრიდან და საკადასტრო-აზომვითი ნახაზი. თუ ამონაწერი წესრიგშია და სახლის მფლობელს არანაირი ფინანსური ვალდებულება არ აკისრია (მაგ.: იპოთეკური სესხი, საგადასახადო გირავნობა), შეგიძლიათ გააფორმოთ ხელშეკრულება და გახდეთ ბინის მესაკუთრე. სახლის შეძენისას აუცილებელია დარწმუნდეთ იმაში, რომ კარგ ინვესტიციას ახორციელებთ. მოცემული რჩევების გათვალიწინებით თავიდან აიცილეთ სერიოზული ხარვეზების მქონე ვარიანტები იმ მარტივი მიზეზით, რომ მათი გამოსწორება-შეკეთება შეიძლება ბევრად ძვირი დაგიჯდეთ.
ლივოს ბლოგი
Livo.ge - უძრავი ქონების პლატფორმა
