როგორ გამოვაჩინოთ სახლი უფრო ფართო და ნათელი

გაზიარება
დამატების თარიღი: 6 ოქტომბერი, 2020

სანამ კითხვას დაიწყებდეთ, ისეთი სივრცე გაიხსენეთ, სადაც თავს მშვიდად გრძნობდით. შეიძლება, სასტუმროს ნომრებიც ამოტივტივდეს მეხსიერებაში. როგორც წესი, სასტუმრო ოთახების უმეტესობა სწორედ ისეა მოწყობილი, რომ ბევრად უფრო დიდი გამოჩნდეს, ვიდრე სინამდვილეშია. 



ოთახის სივრცის წარმოსაჩენად, პირველი ნაბიჯი, რა თქმა უნდა, ალაგებაა. ამის გაკეთებას სულ მცირე რესურსი სჭირდება - შემოიარეთ ოთახები, შეინახეთ ნივთები, მოიშორეთ ზედმეტი ქაღალდები, თუ ყუთები და უადგილო წვრილმანებს ერთად მოუყარეთ თავი. თუ რომელიმე ნივთი არც დეკორის ნაწილია და ხშირადაც არ იყენებთ, იქნებ, სადმე გადაინახოთ, ან გაასხვისოთ. 

ამბობენ, რომ თავისუფალ სივრცეს დამსახურება უნდა. გამოცდილმა მინიმალისტებმა იციან რამხელა თავისუფლების შეგრძნება მოაქვს ცარიელ და სუფთა ზედაპირებს ოთახში და სწორედ ეს თავისუფლება ქრება პირველ რიგში, როცა ვზარმაცობთ და გარშემო არეულობას ვტოვებთ.

ალაგების ჩვევის გამომუშავებისთვის გამოგვადგება საგანგებოდ ზედმეტი ნივთებისთვის განკუთვნილი სათავსოც - ყუთი, ან კალათა, რომელშიც დღის განმავლობაში ყველა უადგილოდ დადებულ საგანს მოათავსებთ. დღის ბოლოს კი, ყველაფერს, რაც ამ სათავსოში მოხვდება, ისევ თავის ადგილას დააბრუნებთ. ამას დიდი დრო არ დასჭირდება, სამაგიეროდ მშვიდი და დალაგებული გარემოს შექმნაში დაგვეხმარება.



რაც უფრო მეტია იატაკის სივრცე, ოთახიც მით უფრო დიდი გამოჩნდება. მართალია, იატაკი სათავსო არ არის, მაგრამ ხშირად გვხვდება კუთხეებში დახვავებული ნივთების გროვა, რომელიც დროთა განმავლობაში კიდევ უფრო იზრდება. ეს უადგილო ნივთები, თანდათან ჩვენს საცხოვრებელ ფართს ხელჰყოფენ და ჩვენც უფრო გვამძიმებენ. ამ გროვების ‘დაძლევა’ და იატაკის მათგან გათავისუფლება დაუყოვნებლივ შექმნის მსუბუქ, უფრო ნათელ სივრცეს.

ეს ეხება ავეჯსა და კედლებს შორის არსებულ იატაკის სივრცესაც. კედლებთან მიჯრილი ავეჯი ოთახის საზღვრებს ზღუდავს და სივრცეც ბევრად პატარა ჩანს. ოთახში სივრცულობის შეგრძნებას გაზრდით, თუ ზოგ ავეჯსა და კედელს შორის მეტ ადგილს დატოვებთ.



კრეატიულად მიუდექით ნივთების განლაგებას და ისიც კრიტიკულად შეაფასეთ, თუ საბოლოოდ რას აირჩევთ დასადებად. შეინარჩუნეთ სისადავე, პლედები სკივრში, ან კალათაში მოათავსეთ, შინაური ცხოველების სათამაშოებისთვის ცალკე სათავსო იქონიეთ, ფოტოები კი, ავეჯის ზედაპირზე დაწყობის ნაცვლად, კედლებზე დაკიდეთ.

მრავალფუნქციური ავეჯი სივრცის ოპტიმიზაციის შესანიშნავი საშუალებაა. ფარული სათავსოები სავარძლებში, ჟურნალის მაგიდებსა და “ოტომანებში”, დაგეხმარებათ საბნების, თამაშებისა და სხვა ზედმეტი ნივთების მოცილებაში, როგორც იატაკიდან, ისე ავეჯის ზედაპირიდან. შეგიძლიათ გამოიყენოთ ღია, ე.წ. “მოტივტივე” თაროები - გარდა იმისა, რომ ნივთების განთავსებაში დაგეხმარებათ, კედლებს ვიზუალურად გააფართოებს.

ნივთები, რომლებსაც ყოველდღე არ იყენებთ და წელიწადში ერთი-ორჯერ თუ გამოგადგებათ, გადაინახეთ სკივრში, საწოლის ქვეშ ან კარადებში.



სარკეში მთელი ოთახი ირეკლება და შეუძლია ორმაგად გაზარდოს სივრცის შეგრძნება. მეტი სინათლითაც ავსებს ოთახს და ქმნის მოძრაობის განცდას. ამისთვის, საუკეთესო იქნება თუ გამოიყენებთ სარკეებს მთელ სიმაღლეზე, თუმცა, კარადის სარკისებური ზედაპირი, ან კედლებზე გადანაწილებული პატარა სარკეებიც შექმნის ეფექტს. 



სივრცე მიზანმიმართულად მორთეთ და ნუ შეუშინდებით ე.წ. “მკვდარ” წერტილებს. გარშემო მიმოფანტული წვრილმანი ნივთები, შეიძლება ქაოტურობის შეგრძნებას ქმნიდეს, რამდენიმე მოზრდილი ფრაგმენტისგან განსხვავებით. თქვენი კრიტიკული შეფასება ყოველ ნივთზე, თუ რამდენად საჭიროა ის, ნამდვილად წაადგება კედლებს, თაროებს, კომოდებს, სამზარეულოს მაგიდებსა, თუ სამუშაო კუთხეებს.

გადახედეთ თქვენი ოთახების კედლებსა და ზედაპირებს. დააკვირდით, მართლა მოგწონთ ყველაფერი, რასაც მათზე ხედავთ? შემდეგ, მოაცილეთ ის ნივთები, რომლებიც არც ისე ძალიან გხიბლავთ და დატოვეთ მხოლოდ ისეთები, რომლებიც თქვენთვის რაღაცას წარმოადგენს, ან თქვენს სტილს განსაზღვრავს.

დეკორის ელემენტების მთელ სივრცეზე გადანაწილების ნაცვლად, შეგიძლიათ ამისთვის ერთი-ორი ადგილი განსაზღვროთ, მაგალითად, ერთგვარი “სააქცენტო” კედელი. თუ რამდენიმე ზედაპირსა და კედელს უბრალოდ ცარიელს დატოვებთ, ოთახი ვიზუალურად კიდევ უფრო ფართო გამოჩნდება. 



თუ ინტერიერის განახლებას გადაწყვეტთ, უპირატესობა დაბალ ავეჯს მიანიჭეთ. ზოგადად, რაც უფრო დაბალია ავეჯი, მით უფრო ფართო ჩანს ოთახი, თუნდაც იმიტომ, რომ მის ზემოთ კიდევ უფრო მეტი ღია სივრცე რჩება. მნიშვნელობა ენიჭება ავეჯის სადგამის ფორმასაც; რაც უფრო გახსნილი, ან პოსტამენტური სტილის სადგამი აქვს ავეჯს, მით უფრო მეტ სივრცეს ქმნის - თითქოს ჰაერში ლივლივებს, ისეთ ავეჯთან შედარებით, რომელიც პირდაპირ იატაკზე დგას. ასევე, შეარჩიეთ ისეთი სასადილო სკამები, რომლებსაც მთლიანად შეაცურებთ მაგიდის ქვეშ, როცა არ იყენებთ. 



სინათლე მარტივი და ძლიერი ინსტრუმენტია, რომლითაც მთლიანად შეძლებთ ოთახის გარდაქმნას. სივრცეს ვიზუალურად გააფართოებთ, თუ შედარებით ბნელ კუთხეებს გაანათებთ და ოთახში სინათლის სხვადასხვა წყაროს უზრუნველყოფთ.

შეიძლება, ოთახის შუაგულში, მხოლოდ ერთი სინათლის წყაროს გამოყენება ეკონომიური იყოს, მაგრამ ამ გზით ყველაფერი კიდევ უფრო პატარა გამოჩნდება. დაამატეთ თქვენს სივრცეში 2 ან 3 სინათლის წყარო და ნახავთ, გარშემო როგორ შეიცვლება ატმოსფერო. განათების გაშლით, ამ სიტყვის პირადპირი გაგებით, ასევე მეტაფორულად გაშლით ოთახს.


ლივოს ბლოგი


livo.ge - უძრავი ქონების პლატფორმა

სხვა ბლოგები