დახურვა
TNET

ყველაზე დიდი ტექნოლოგიური ეკოსისტემა, რომელიც აერთიანებს 10 პლატფორმას:

myAuto
myHome
myMarket
myParts
vendoo
swoop
tkt
livo
saba
myshop
superApp

ვინტაჟური სტილი ინტერიერში

გაზიარება
დამატების თარიღი: 9 აგვისტო, 2021

მყუდრო, ნოსტალგიური, რომანტიული - დიდი ხნის ნაცნობი ატმოსფერო, სასიამოვნო მოგონებებთან დაკავშირებული და მერე რა, თუ ამ მოგონებებთან საერთო შეიძლება არც დროში გვქონდეს და არც სივრცეში. სტილი შეიძლება ძველი ფილმებიდან ისესხო, ან გაიხსენო ბებია-ბაბუის ავეჯი, თაობებ-გამოვლილი ნივეთები, პლედები სარწეველა სკამებზე და რომელიღაც სკივრსა, თუ გარდერობის თავზე გადანახული ფირის ფოტოაპარატი, ვინილები, ჟურნალები და სხვა.



წარმოიდგინე საუკუნოვანი მარანიდან ამოტანილი მტვრიანი ბოთლი, მინიმუმ 30 წლის წინანდელ რთველზე დაწურული ღვინით, საგულდაგულოდ შენახული განსაკუთრებული დღისთვის, ან განსაკუთრებული ადამიანისთვის. მაშინ, ადვილად წარმოიდგენ იმ განწყობასაც, რომლის შექმნასაც ემსახურება ვინტაჟი, როგორც სტილი ინტერიერში. “ვინტაჟი” ფრანგული სიტყვაა და ნიშნავს რთველს, ან უმაღლესი ხარისხის ღვინოს კონკრეტული წლის მოსავლიდან. შესაბამისად, თავისი მნიშვნელობით, ასახავს ყველაფერს ძველს, ძვირფასს, განსაკუთრებულს.

ინტერიერის ვინტაჟურ სტილში მოწყობას ერთი ძირითადი წესი აქვს - მაქსიმალური სიმყუდროვე. დანარჩენი კი ასეა:

●     ქმნი ერთი ფერის გამას - ნათელს, დახვეწილს, მშვიდს… ძირითადად არჩევ ბაცი ფერებიდან, იქნება ეს: ბეჟი, ნაცრისფერი, ქვიშისფერი, კრემისფერი. შეგიძლია შეარჩიო ღია ვარდისფერი, ცისფერი ან იასამნისფერიც;

●     იყენებ ძველ-მოდურ, ან ხელოვნურად დაძველებულ ავეჯს;

●     კარგი იქნება, თუ უპირატესობას ბუნებრივ მასალას მიანიჭებ - ხეს, ორგანულ ქსოვილებს, იშვიათად ქვას, ან ჭედურ ელემენტებს;

●     ვინტაჟის სტილში წარსულის ტრენდებს ირეკლავ, პირობითად ყველაფერს რაც 30 წელზე მეტს და 60 წელზე ნაკლებს ითვლის;

●     ოთახის დიზაინი ერთდროულად მარტივი და მომხიბვლელია. ნახეთქები, სიძველის ნიშნები სიმყუდროვის, სიმშვიდისა და ნოსტალგიის შეგრძნებას ტოვებს;

●     შეგიძლია ძველი და ახალი გააერთიანო, თუმცა აქცენტირება რამდენიმე სახასიათო ნივთზე გააკეთე, რომელიც განსაკუთრებულ ისტორიას, წარმომავლობას, ან ცნობადობას ატარებს. 



სწორად მოწყობილ ვინტაჟურ ინტერიერში ავეჯი ისტორიას ატარებს, მაშინაც კი, როცა “ისტორიულობის” სიმულირება ხდება. მიუხედავად სიძველის ნიშნებისა, ავეჯი მყარი და ესთეტურია, ჰარმონიულად ერწყმის სივრცეს და უმეტეს შემთხვევაში, სტილისტურად ერთ ეპოქას მიეკუთვნება. ამავე დროს, არ ქმნის სახლ-მუზეუმის ეფექტს. 

ვინტაჟის სტილის ავეჯის შერჩევა-დამზადებისას რამდენიმე კრიტერიუმია გასათვალისწინებელი:

●     გამოიყენება ბუნებრივი მასალა: ხე, ქსოვილი;

●     რაც მეტია ტექსტურა მით უკეთესი;

●     ნებისმიერი ცვეთის ნიშანი - ნაკაწრი, ბზარი, ნახეთქი ორგანულად გამოიყურება;

●     გაფორმებისას, გამოიყენეთ ჭედური ელემენტები, ხის, ბრინჯაოს ან სპილენძის ფურნიტურა/აქსესუარები;

●     ავეჯის მაგალითები: კომოდი მოჩუქურთმებული სახელურებით, რბილი სკამები, დივანი ხის ელემენტებითა და მომრგვალებული ფეხებით, მაღალზურგიანი სავარძელი და მასიური სასადილო მაგიდა, საწოლი მოჩუქურთმებული, ან ჭედური თავით, სარწეველა სავარძელი, სკივრი…



დეკორატიული ელემენტების გარეშე ვინტაჟის სტილი თითქმის წარმოუდგენელია, თუმცა აქაც ზომიერებაა დასაცავი, რომ საბოლოოდ, სივრცე ძველმანების გამოფენას არ დაემსგავსოს. 

მანამდე კი რამდენიმე რეკომენდაცია:

●     დეკორში ჭარბობს სპილენძის, კერამიკის ან ხისგან დამზადებული ნივთები;

●     კედლები შეგიძლია გააფორმო შავ-თეთრი ფოტოებით, მოჩუქურთმებულ ხის ჩარჩოებში ჩასმული ორნამენტებითა და ნახატებით;

●     ვინტაჟი ყვავილების გარეშე წარმოუდგენელია, როგორც ბუნებრივი, ისე დეკორატიული;

●     განსაკუთრებულ ატმოსფეროს ქმნის ანტიკვარული საათები, ლამფები, შანდლები, ვაზები, წიგნები, ჩარჩოები;

●     ყუთები, წიგნის ყდები, უჯრები ან ავეჯის ზედაპირი შეგიძლია დეკუპაჟის ტექნიკით გააფორმო.

●     დახვეწილ ხის ჩარჩოში ჩასმული დიდი სარკე ნებისმიერ ოთახს გამოაცოცხლებს.

●     ვინტაჟს განსაკუთრებით უხდება ხალიჩები, რაც უფრო ძველებური იქნება, მით უკეთესი. 



ვინტაჟი, როგორც სტილი საკმაოდ სპონტანურად წარმოიშვა ჯერ მუსიკისა და მოდის სფეროებში, შემდეგ კი - ინტერიერის დიზაინში.

ოფიციალურად, სტილის დაფუძნებას ამერიკელ არქიტექტორს - პატრიკ უილისს მიაწერენ. 2002 წელს, პატრიკმა ორიგინალური, ელიფსის ფორმის სახლი ააშენა, დაკიდული აივნებითა და ხუთ კედლიანი ოთახებით, მაგრამ შენობის დასრულებისთვის, ინტერიერის მოსაწყობად ფინანსები აღარ ჰყოფნიდა. გამოსავალი ძველმანების ბაზრობა აღმოჩნდა, სადაც იაფად შეიძინა ძველი ავეჯი და დეკორატიული ნივთები, რითიც საბოლოოდ გააწყო ოთახები. არქიტექტურული პროექტის წარდგენისას კი, ჟურნალისტებსა და კრიტიკოსებს განუცხადა, რომ მათ წინაშე ახალი დიზაინერული კონცეფციაა, სახელწოდებით - ვინტაჟი!

დღეისათვის, შეიძლება ითქვას, სტილისტური მიმდინარეობაა, რომელიც გასული ეპოქის მომხიბვლელობას უსვამს ხაზს და ნაცნობი, თითქოს ბავშვობიდან გადმოტანილი ნივთებით მყუდრო ატმოსფეროს შექმნას ცდილობს.

როგორც წესი, ვინტაჟად აღიქმება ყველაფერი რაც 30 წელზე ძველია და მაქსიმუმ 60 წლის. ხოლო ის, რაც მე - 20 საუკუნის დასაწყისში შეიქმნა სულ სხვა სტილს - რეტროს მიეკუთვნება. თუმცა, მსგავსი დიფერენციაცია ჯერჯერობით საკმაოდ პირობითია და ისიც მოდის სამყაროდანაა ნასესხები.



დღეს, ძველი ნივთისთვის ახალი სიცოცხლის მიცემა სოციალურ აქტივიზმს უტოლდება, იქცევა რა ეკოლოგიურობისა და გაცნობიერებული მოხმარების ერთგვარ მანიფესტაციად.

თუმცა, ვინტაჟი იმასაც გულისხმობს, რომ ის ერთგვარ სითბოს, მზრუნველობას, ამბავს ატარებს, რომელიც პირველ რიგში, შენთვისაა ძვირფასი, თუნდაც ესთეტური თვალსაზრისით და სანამ შენ გვერდითაა, ამ ამბის “გაგრძელება იქნება”.

“და რა კარგია, როცა ისეთი რაღაც გაქვს, რასაც ადვილად ვერ ემშვიდობები” - ვინი პუჰი😊


სხვა ბლოგები

ზარის მოთხოვნა
ონლაინ ჩატი
შეფასება